Таҳлилларга кўра, бир неча йиллар олдин жаҳон бўйича қуёш панеллари ёрдамида олинаётган умумий энергия миқдори 4-5 ГВт ни ташкил этган бўлса, ҳозирги кунда ўрнатилган фотоэлектрик станциялар қуввати 700 ГВтдан ошиб кетди.

　　Шу маънода, мамлакатимизда экологик тоза энергия манбаларига асосланган лойиҳалар ишлаб чиқилиши ҳамда бунга маҳаллий ва хорижий сармоядорларни кенг жалб қилишга алоҳида эътибор қаратилмоқда.

　　Ўзбекистондаги Қуёш энергияси халқаро институти Хитой Халқ Республикасининг "Henan Suda Electric Vehicles Technology Co., Ltd." компанияси билан айнан шу муқобил манба асосида замонавий электромобиль технологияларини амалиётга татбиқ этиш лойиҳаси бўйича ҳамкорлик қилмоқда.

　　Бугун институтда маҳаллий ва хорижий экспертлар, мутахассислар иштирокида ташкил этилган семинар ушбу лойиҳанинг аҳамияти ва афзалликларига бағишланди.

　　Унда юртимизда соҳа бўйича амалга оширилаётган халқаро ҳамкорликлар қуёш энергиясидан саноатда фойдаланиш борасидаги юқори технологик ишланмаларни амалга ошириш, илғор ва иқтисодий жиҳатдан самарали технологиялар асосида иқтисодиётнинг турли тармоқлари ва ижтимоий соҳада қуёш энергияси имкониятларидан амалий фойдаланишга хизмат қилиши ҳақида сўз борди.

　　– Бугунги семинардан асосий мақсад иштирокчиларни "Henan Suda Electric Vehicles Technology Co., Ltd." компанияси ютуқлари билан таништириш орқали уларнинг тажрибаларини ўрганиш ва юртимизга татбиқ этишдир, – деди Қуёш энергияси халқаро институти директори Нураддин Матчонов. – Дастлаб 2017 йил бу компания билан мамлакатимизда электромобиллар саноатини ривожлантириш бўйича дастлабки ҳамкорлик меморандумини имзолашга эришган эдик. Ўтган вақт мобайнида бу борада компаниянинг фаолиятини ўргандик. Улар бизнинг иш жараёнимиз билан танишди. Бугун эса ҳамкорларимиз билан институтимиз қошида компанияга қарашли институт филиалини ташкил этиш бўйича келишувга эришдик. Албатта, замонавий электромобиль технологияларини жорий этиш босқичма-бочқич амалга оширилади.

　　Таъкидлаш керакки, Хитойнинг бу компанияси 2010 йилда ташкил этилган. Бугунги кунда компания йилига 100 мингдан ортиқ электромобиль технологияларини ишлаб чиқариш қувватига эга. Семинарда ушбу компания бош директори Ли Фухога Қуёш энергияси халқаро институтининг фахрий доктори унвони берилди.

　　– Бундай эътирофдан бошим кўкка етди, – деди у. – Икки мамлакат ўртасида ҳамкорлигимиз янада юксалаверсин. Бугунги тадбирда делегация аъзолари таркибида 5 нафар экспертимиз ҳам қатнашмоқда. Улар соҳага доир тажрибасини ўзбек мутахассислари билан ўртоқлашади.

　　Насиба ЗИЁДУЛЛАЕВА, ЎзА